மாற்றமே மருந்து

கவிஞர் கு.மா.பா.திருநாவுக்கரசு 

வர்ணாசிரம பேதம் காட்டி
வஞ்சனையாய்ப் பஞ்சமரென்று
தர்மத்தின் நெறியெனச் சொல்லி
தாழ்மைப்படுத்தி வைத்து,
ஆதிக்க வெறி பிடித்தோர்
ஆட்டிப் படைத்துயர்ந்தார்! - சமூக
நீதியை எடுத்துரைக்க
நிலைமைகள் மாறிற்றின்று! 

தீண்டாமை திணித்தோரின்று
தீண்டாமைத் தீயில் நொந்தார்!
தாழ்வென்று சொன்ன வேலை;
தான்செயப் பழகிக் கொண்டார்!
ஆண்டவர்க்குச் செய்யும் சேவை
அருகதை அற்றுப் போனார்! - எங்கும்
தாண்டவமாடும் தொற்றால்
சமூக விலக்கம் கண்டார்! 

கவசங்கள் அணிவோர் கூட
கரோணா பாதக  முற்றார்!
அவரவர் துப்புரவென்னும்
அவசியத் தூய்மை கற்றார்!
ஒருவரையொருவர் சார்ந்து
உய்வதே வாழ்வென்றுணர்ந்தார்!
மருந்திலாத் தொற்றால் பெற்ற - பெரும்
மாற்றமே மருந்தாய்க் கொள்வார்!

உங்கள் கருத்து மற்றும் படைப்புக்களை
 editor@tamilauthors.com  என்ற மின் அஞ்சல் முகவரிக்கு அனுப்பவும்