தாயின் அரவணைப்பும் தந்தையின் பேரன்பும்
சேயின் நலமுயர்த்தும் சீராக:- ஆயினுமென்?
பேயின் குணத்தோடு பெற்றோரைப் பேணாதோர்
நாயினும் கீழாம் நவில்.
 

ஆயிரம் நூலறிவை அன்றாடம் கற்பித்து
மாயிருள் நீக்கும் மதியாசான்:- தூயிறையாம்
தாயினும் மேலோனைத் தான்மதியா மாணாக்கர்
நாயினும் கீழாம் நவில்.
 

வாயினால் தானுரைத்த வாக்கினையே காவாமல்
பேயினைப் போலாள்தல் பேதைமை:- கோயிறைகள்
தூயிறையாய் வாழாமல் தொட்டதெலாம் ஊழலெனின்
நாயினும் கீழாம் நவில்.