புத்தாண்டே    அருள்வாயா....  

மன்னார் அமுதன்                               
                                           
புத்தாண்டில் பல புதுமை 
பூக்க வேண்டும் - முப்
பத்தாண்டு துன்பமெல்லாம் 
போக்க வேண்டும்

மத்தாப்பாய் எம்வாழ்வு
மலர வேண்டும் - மனதில்
நிறைந்த பகை புகையாக
மறைய வேண்டும்

இறைவனிடம் நம்பிக்கை 
கொள்ள வேண்டும் - தொழிலில்
இயன்றவரை புதுமுயற்சி 
செய்ய வேண்டும்  

சத்தான இலக்கியங்கள் 
ஆக்க வேண்டும் - தமிழன்
சாதீயக் கொள்கைகளை
நீக்க வேண்டும்

பயன் அறிந்து பாராட்டா
நட்பு வேண்டும் - மார்பில்
படுமாறு அடிக்கின்ற 
எதிரி வேண்டும்

இல்லற இன்பங்கள் 
நிறைய வேண்டும் – நாட்டில்
இனிய தமிழ்க் குழந்தைகள் 
பெருக வேண்டும்

நல்லறத்தை நம்மவர்கள் 
அறிய வேண்டும் – எவர்க்கும்
நலம்தரும் செயல்களையே 
புரிய வேண்டும்

சோதனைகள் எம்மைச்சீர்
தூக்க வேண்டும் – வாழ்வில்
சோர்வென்ற சொல்லை நாம் 
நீக்க வேண்டும்

சாதனைகள் ஆயிரம் நாம் 
படைக்க வேண்டும் – மக்கள்
வேதனைகள் பொடிப்பொடியாய் 
உடைக்க வேண்டும்

பாதகர்கள் செயல்களையே 
படிக்க வேண்டும் – பாட்டால்
பயத்தினிலே அவர் இதயம்
துடிக்க வேண்டும்

பார் போற்றும் பண்புடனே 
வாழ வேண்டும் – அயலில்
பசித்தோரைக் கண்டு உளம் 
நோக வேண்டும்

புசிக்கையிலே பசித்தவர்க்கும் 
ஈய வேண்டும் – ஊர்வாய்ப்
புகழ்ச்சியையும் இகழ்ச்சியையும் 
தாங்க வேண்டும்

கம்பிவேலிக் கூண்டுகள் தூள்
ஆக வேண்டும் - எங்கள்
சிறகொடிந்த பறவைகள் வான்
காண வேண்டும்

பல நூறு ஆண்டுகள் நாம் 
ஆள வேண்டும் – அறத்தில்
பல கோடி நல்லிதயம் 
வாழ வேண்டும்

amujo1984@gmail.com